⁴⁰Erant autem et mulieres de longe aspicientes: inter quas erat Maria Magdalene, et Maria Jacobi minoris, et Joseph mater, et Salome: ⁴¹et cum esset in Galilæa, sequebantur eum, et ministrabant ei, et aliæ multæ, quæ simul cum eo ascenderant Jerosolymam. ⁴²Et cum jam sero esset factum (quia erat parasceve, quod est ante sabbatum), ⁴³venit Joseph ab Arimathæa nobilis decurio, qui et ipse erat exspectans regnum Dei, et audacter introivit ad Pilatum, et petiit corpus Jesu. ⁴⁴Pilatus autem mirabatur si jam obiisset. Et accersito centurione, interrogavit eum si jam mortuus esset. ⁴⁵Et cum cognovisset a centurione, donavit corpus Joseph. ⁴⁶Joseph autem mercatus sindonem, et deponens eum involvit sindone, et posuit eum in monumento quod erat excisum de petra, et advolvit lapidem ad ostium monumenti. ⁴⁷Maria autem Magdalene et Maria Joseph aspiciebant ubi poneretur.

Read in Logos

Public Domain