²¹Et angariaverunt prætereuntem quempiam, Simonem Cyrenæum venientem de villa, patrem Alexandri et Rufi, ut tolleret crucem ejus. ²²Et perducunt illum in Golgotha locum: quod est interpretatum Calvariæ locus. ²³Et dabant ei bibere myrrhatum vinum: et non accepit. ²⁴Et crucifigentes eum, diviserunt vestimenta ejus, mittentes sortem super eis, quis quid tolleret. ²⁵Erat autem hora tertia: et crucifixerunt eum. ²⁶Et erat titulus causæ ejus inscriptus: Rex Judæorum. ²⁷Et cum eo crucifigunt duos latrones: unum a dextris, et alium a sinistris ejus. ²⁸Et impleta est Scriptura, quæ dicit: Et cum iniquis reputatus est. ²⁹Et prætereuntes blasphemabant eum, moventes capita sua, et dicentes: Vah! qui destruis templum Dei, et in tribus diebus reædificas, ³⁰salvum fac temetipsum descendens de cruce. ³¹Similiter et summi sacerdotes illudentes, ad alterutrum cum scribis dicebant: Alios salvos fecit; seipsum non potest salvum facere. ³²Christus rex Israël descendat nunc de cruce, ut videamus, et credamus. Et qui cum eo crucifixi erant, convitiabantur ei.

³³Et facta hora sexta, tenebræ factæ sunt per totam terram usque in horam nonam. ³⁴Et hora nona exclamavit Jesus voce magna, dicens: Eloi, eloi, lamma sabacthani? quod est interpretatum: Deus meus, Deus meus, ut quid dereliquisti me? ³⁵Et quidam de circumstantibus audientes, dicebant: Ecce Eliam vocat. ³⁶Currens autem unus, et implens spongiam aceto, circumponensque calamo, potum dabat ei, dicens: Sinite, videamus si veniat Elias ad deponendum eum. ³⁷Jesus autem emissa voce magna expiravit.

³⁸Et velum templi scissum est in duo, a summo usque deorsum. ³⁹Videns autem centurio, qui ex adverso stabat, quia sic clamans expirasset, ait: Vere hic homo Filius Dei erat.

⁴⁰Erant autem et mulieres de longe aspicientes: inter quas erat Maria Magdalene, et Maria Jacobi minoris, et Joseph mater, et Salome:

Read in Logos

Mark 15:34: … My God, my God, why have you forsaken me?

Public Domain