Leviticus 19:11–18

¹¹Non facietis furtum. Non mentiemini, nec decipiet unusquisque proximum suum. ¹²Non perjurabis in nomine meo, nec pollues nomen Dei tui. Ego Dominus. ¹³Non facies calumniam proximo tuo nec vi opprimes eum. Non morabitur opus mercenarii tui apud te usque mane. ¹⁴Non maledices surdo, nec coram cæco pones offendiculum: sed timebis Dominum Deum tuum, quia ego sum Dominus. ¹⁵Non facies quod iniquum est, nec injuste judicabis. Non consideres personam pauperis, nec honores vultum potentis. Juste judica proximo tuo. ¹⁶Non eris criminator, nec susurro in populo. Non stabis contra sanguinem proximi tui. Ego Dominus. ¹⁷Non oderis fratrem tuum in corde tuo, sed publice argue eum, ne habeas super illo peccatum. ¹⁸Non quæras ultionem, nec memor eris injuriæ civium tuorum. Diliges amicum tuum sicut teipsum. Ego Dominus.