¹Hæc locutus est Jesus: et sublevatis oculis in cælum, dixit: Pater, venit hora: clarifica Filium tuum, ut Filius tuus clarificet te: ²sicut dedisti ei potestatem omnis carnis, ut omne, quod dedisti ei, det eis vitam æternam. ³Hæc est autem vita æterna: ut cognoscant te, solum Deum verum, et quem misisti Jesum Christum. ⁴Ego te clarificavi super terram: opus consummavi, quod dedisti mihi ut faciam: ⁵et nunc clarifica me tu, Pater, apud temetipsum, claritate quam habui, priusquam mundus esset, apud te.

⁶Manifestavi nomen tuum hominibus, quos dedisti mihi de mundo: tui erant, et mihi eos dedisti: et sermonem tuum servaverunt. ⁷Nunc cognoverunt quia omnia quæ dedisti mihi, abs te sunt: ⁸quia verba quæ dedisti mihi, dedi eis: et ipsi acceperunt, et cognoverunt vere quia a te exivi, et crediderunt quia tu me misisti.

Read in Logos

John 17:4: I glorified you on earth, having accomplished the work that you gave me to do.

Public Domain