Jeremiah 9:16–21

¹⁶Et dispergam eos in gentibus

quas non noverunt ipsi et patres eorum,

et mittam post eos gladium,

donec consumantur.

¹⁷Hæc dicit Dominus exercituum, Deus Israël:

Contemplamini, et vocate lamentatrices, et veniant:

et ad eas quæ sapientes sunt mittite, et properent:

¹⁸festinent, et assumant super nos lamentum:

deducant oculi nostri lacrimas,

et palpebræ nostræ defluant aquis.

¹⁹Quia vox lamentationis audita est de Sion:

Quomodo vastati sumus,

et confusi vehementer?

quia dereliquimus terram;

quoniam dejecta sunt tabernacula nostra.

²⁰Audite ergo, mulieres, verbum Domini,

et assumant aures vestræ sermonem oris ejus,

et docete filias vestras lamentum,

et unaquaeque proximam suam planctum:

²¹quia ascendit mors per fenestras nostras;

ingressa est domos nostras,

disperdere parvulos deforis,

juvenes de plateis.