Jeremiah 17:19–27

¹⁹Hæc dicit Dominus ad me: Vade, et sta in porta filiorum populi, per quam ingrediuntur reges Juda, et egrediuntur, et in cunctis portis Jerusalem: ²⁰et dices ad eos:

Audite verbum Domini,

reges Juda, et omnis Juda,

cunctique habitatores Jerusalem,

qui ingredimini per portas istas.

²¹Hæc dicit Dominus:

Custodite animas vestras,

et nolite portare pondera in die sabbati,

nec inferatis per portas Jerusalem:

²²et nolite ejicere onera de domibus vestris in die sabbati,

et omne opus non facietis:

sanctificate diem sabbati,

sicut præcepi patribus vestris.

²³Et non audierunt, nec inclinaverunt aurem suam:

sed induraverunt cervicem suam, ne audirent me,

et ne acciperent disciplinam.

²⁴Et erit: si audieritis me, dicit Dominus,

ut non inferatis onera per portas civitatis hujus in die sabbati:

et si sanctificaveritis diem sabbati,

ne faciatis in eo omne opus:

²⁵ingredientur per portas civitatis hujus reges et principes,

sedentes super solium David,

et ascendentes in curribus et equis,

ipsi et principes eorum,

viri Juda, et habitatores Jerusalem:

et habitabitur civitas hæc in sempiternum.

²⁶Et venient de civitatibus Juda,

et de circuitu Jerusalem,

et de terra Benjamin,

et de campestribus, et de montuosis, et ab austro,

portantes holocaustum, et victimam,

et sacrificium, et thus,

et inferent oblationem in domum Domini.

²⁷Si autem non audieritis me

ut sanctificetis diem sabbati,

et ne portetis onus,

et ne inferatis per portas Jerusalem in die sabbati,

succendam ignem in portis ejus,

et devorabit domos Jerusalem,

et non extinguetur.