Jeremiah 11:16–19

¹⁶Olivam uberem, pulchram, fructiferam, speciosam,

vocavit Dominus nomen tuum:

ad vocem loquelæ, grandis exarsit ignis in ea,

et combusta sunt fruteta ejus.

¹⁷Et Dominus exercituum, qui plantavit te,

locutus est super te malum,

pro malis domus Israël, et domus Juda,

quæ fecerunt sibi ad irritandum me,

libantes Baalim.

¹⁸Tu autem, Domine, demonstrasti mihi, et cognovi:

tunc ostendisti mihi studia eorum.

¹⁹Et ego quasi agnus mansuetus,

qui portatur ad victimam:

et non cognovi quia cogitaverunt super me consilia, dicentes:

Mittamus lignum in panem ejus,

et eradamus eum de terra viventium,

et nomen ejus non memoretur amplius.