Isaiah 46:1–4

1 Confractus est Bel, contritus est Nabo;

facta sunt simulacra eorum bestiis et jumentis,

onera vestra gravi pondere

usque ad lassitudinem.

2 Contabuerunt, et contrita sunt simul;

non potuerunt salvare portantem,

et anima eorum in captivitatem ibit.

3 Audite me, domus Jacob,

et omne residuum domus Israël;

qui portamini a meo utero,

qui gestamini a mea vulva.

4 Usque ad senectam ego ipse,

et usque ad canos ego portabo;

ego feci, et ego feram;

ego portabo, et salvabo.