Hosea 11–12

11¹Sicut mane transiit, pertransiit rex Israël.

Quia puer Israël, et dilexi eum;

et ex Ægypto vocavi filium meum.

²Vocaverunt eos, sic abierunt a facie eorum;

Baalim immolabant, et simulacris sacrificabant.

³Et ego quasi nutritius Ephraim:

portabam eos in brachiis meis,

et nescierunt quod curarem eos.

⁴In funiculis Adam traham eos,

in vinculis caritatis;

et ero eis quasi exaltans jugum super maxillas eorum,

et declinavi ad eum ut vesceretur.

⁵Non revertetur in terram Ægypti, et Assur ipse rex ejus,

quoniam noluerunt converti.

⁶Cœpit gladius in civitatibus ejus,

et consumet electos ejus,

et comedet capita eorum.

⁷Et populus meus pendebit ad reditum meum;

jugum autem imponetur eis simul, quod non auferetur.

⁸Quomodo dabo te, Ephraim?

protegam te, Israël?

Quomodo dabo te sicut Adama,

ponam te ut Seboim?

Conversum est in me cor meum,

pariter conturbata est pœnitudo mea.

⁹Non faciam furorem iræ meæ;

non convertar ut disperdam Ephraim,

quoniam Deus ego, et non homo;

in medio tui sanctus,

et non ingrediar civitatem.

¹⁰Post Dominum ambulabunt;

quasi leo rugiet,

quia ipse rugiet,

et formidabunt filii maris.

¹¹Et avolabunt quasi avis ex Ægypto,

et quasi columba de terra Assyriorum:

et collocabo eos in domibus suis, dicit Dominus.

¹²Circumdedit me in negatione Ephraim,

et in dolo domus Israël;

Judas autem testis descendit cum Deo,

et cum sanctis fidelis.

12¹Ephraim pascit ventum,

et sequitur æstum;

tota die mendacium et vastitatem multiplicat:

et fœdus cum Assyriis iniit,

et oleum in Ægyptum ferebat.

²Judicium ergo Domini cum Juda,

et visitatio super Jacob:

juxta vias ejus, et juxta adinventiones ejus reddet ei.

³In utero supplantavit fratrem suum,

et in fortitudine sua directus est cum angelo.

⁴Et invaluit ad angelum, et confortatus est;

flevit, et rogavit eum.

In Bethel invenit eum,

et ibi locutus est nobiscum.

⁵Et Dominus Deus exercituum,

Dominus memoriale ejus.

⁶Et tu ad Deum tuum converteris;

misericordiam et judicium custodi,

et spera in Deo tuo semper.

⁷Chanaan, in manu ejus statera dolosa,

calumniam dilexit.

⁸Et dixit Ephraim: Verumtamen dives effectus sum;

inveni idolum mihi:

omnes labores mei non invenient mihi iniquitatem quam peccavi.

⁹Et ego Dominus Deus tuus ex terra Ægypti:

adhuc sedere te faciam in tabernaculis, sicut in diebus festivitatis.

¹⁰Et locutus sum super prophetas,

et ego visionem multiplicavi,

et in manu prophetarum assimilatus sum.

¹¹Si Galaad idolum, ergo frustra erant in Galgal bobus immolantes;

nam et altaria eorum quasi acervi super sulcos agri.

¹²Fugit Jacob in regionem Syriæ,

et servivit Israël in uxorem,

et in uxorem servavit.

¹³In propheta autem eduxit Dominus Israël de Ægypto,

et in propheta servatus est.

¹⁴Ad iracundiam me provocavit Ephraim in amaritudinibus suis:

et sanguis ejus super eum veniet,

et opprobrium ejus restituet ei Dominus suus.