¹Umbram enim habens lex futurorum bonorum, non ipsam imaginem rerum: per singulos annos, eisdem ipsis hostiis quas offerunt indesinenter, numquam potest accedentes perfectos facere: ²alioquin cessassent offerri: ideo quod nullam haberent ultra conscientiam peccati, cultores semel mundati: ³sed in ipsis commemoratio peccatorum per singulos annos fit. ⁴Impossibile enim est sanguine taurorum et hircorum auferri peccata. ⁵Ideo ingrediens mundum dicit: Hostiam et oblationem noluisti: corpus autem aptasti mihi: ⁶holocautomata pro peccato non tibi placuerunt. ⁷Tunc dixi: Ecce venio: in capite libri scriptum est de me: Ut faciam, Deus, voluntatem tuam. ⁸Superius dicens: Quia hostias, et oblationes, et holocautomata pro peccato noluisti, nec placita sunt tibi, quæ secundum legem offeruntur, ⁹tunc dixi: Ecce venio, ut faciam, Deus, voluntatem tuam: aufert primum, ut sequens statuat. ¹⁰In qua voluntate sanctificati sumus per oblationem corporis Jesu Christi semel.

Read in Logos

Hebrews 10:10: And by that will we have been sanctified through the offering of the body of Jesus Christ once for all.

Public Domain