¹⁴Surrexit itaque Abraham mane, et tollens panem et utrem aquæ, imposuit scapulæ ejus, tradiditque puerum, et dimisit eam. Quæ cum abiisset, errabat in solitudine Bersabee. ¹⁵Cumque consumpta esset aqua in utre, abjecit puerum subter unam arborum, quæ ibi erant. ¹⁶Et abiit, seditque e regione procul quantum potest arcus jacere: dixit enim: Non videbo morientem puerum: et sedens contra, levavit vocem suam et flevit. ¹⁷Exaudivit autem Deus vocem pueri: vocavitque angelus Dei Agar de cælo, dicens: Quid agis Agar? noli timere: exaudivit enim Deus vocem pueri de loco in quo est. ¹⁸Surge, tolle puerum, et tene manum illius: quia in gentem magnam faciam eum. ¹⁹Aperuitque oculos ejus Deus: quæ videns puteum aquæ, abiit, et implevit utrem, deditque puero bibere. ²⁰Et fuit cum eo: qui crevit, et moratus est in solitudine, factusque est juvenis sagittarius. ²¹Habitavitque in deserto Pharan, et accepit illi mater sua uxorem de terra Ægypti.

Read in Logos

Public Domain