Ezekiel 39:17–20

¹⁷Tu ergo, fili hominis, hæc dicit Dominus Deus:

Dic omni volucri, et universis avibus,

cunctisque bestiis agri:

Convenite, properate,

concurrite undique ad victimam meam

quam ego immolo vobis,

victimam grandem super montes Israël,

ut comedatis carnem,

et bibatis sanguinem.

¹⁸Carnes fortium comedetis,

et sanguinem principum terræ bibetis:

arietum, et agnorum, et hircorum,

taurorumque et altilium, et pinguium omnium.

¹⁹Et comedetis adipem in saturitatem,

et bibetis sanguinem in ebrietatem,

de victima quam ego immolabo vobis:

²⁰et saturabimini super mensam meam

de equo, et equite forti,

et de universis viris bellatoribus,

ait Dominus Deus.