Ezekiel 23:31–35

³¹In via sororis tuæ ambulasti,

et dabo calicem ejus in manu tua.

³²Hæc dicit Dominus Deus:

Calicem sororis tuæ bibes profundum et latum:

eris in derisum et in subsannationem quæ est capacissima.

³³Ebrietate et dolore repleberis:

calice mœroris et tristitiæ,

calice sororis tuæ Samariæ.

³⁴Et bibes illum, et epotabis usque ad fæces:

et fragmenta ejus devorabis,

et ubera tua lacerabis,

quia ego locutus sum, ait Dominus Deus.

³⁵Propterea hæc dicit Dominus Deus:

Quia oblita es mei,

et projecisti me post corpus tuum,

tu quoque porta scelus tuum et fornicationes tuas.