¹In anno decimo, decimo mense, undecima die mensis, factum est verbum Domini ad me, dicens: ²Fili hominis, pone faciem tuam contra Pharaonem regem Ægypti, et prophetabis de eo, et de Ægypto universa. ³Loquere, et dices:

Hæc dicit Dominus Deus:

Ecce ego ad te, Pharao rex Ægypti, draco magne,

qui cubas in medio fluminum tuorum, et dicis:

Meus est fluvius, et ego feci memetipsum.

⁴Et ponam frenum in maxillis tuis,

et agglutinabo pisces fluminum tuorum squamis tuis,

et extraham te de medio fluminum tuorum,

et universi pisces tui squamis tuis adhærebunt.

⁵Et projiciam te in desertum,

et omnes pisces fluminis tui:

super faciem terræ cades;

non colligeris, neque congregaberis:

bestiis terræ et volatilibus cæli dedi te ad devorandum.

⁶Et scient omnes habitatores Ægypti quia ego Dominus,

pro eo quod fuisti baculus arundineus domui Israël:

⁷quando apprehenderunt te manu, et confractus es,

et lacerasti omnem humerum eorum:

et innitentibus eis super te comminutus es,

et dissolvisti omnes renes eorum.

⁸Propterea hæc dicit Dominus Deus:

Ecce ego adducam super te gladium,

et interficiam de te hominem et jumentum.

⁹Et erit terra Ægypti in desertum et in solitudinem:

et scient quia ego Dominus,

pro eo quod dixeris: Fluvius meus est, et ego feci eum.

¹⁰Idcirco ecce ego ad te, et ad flumina tua:

daboque terram Ægypti in solitudines,

gladio dissipatam,

a turre Syenes usque ad terminos Æthiopiæ.

¹¹Non pertransibit eam pes hominis,

neque pes jumenti gradietur in ea,

et non habitabitur quadraginta annis.

¹²Daboque terram Ægypti desertam in medio terrarum desertarum,

et civitates ejus in medio urbium subversarum,

et erunt desolatæ quadraginta annis:

et dispergam Ægyptios in nationes,

et ventilabo eos in terras.

¹³Quia hæc dicit Dominus Deus:

Post finem quadraginta annorum congregabo Ægyptum

de populis in quibus dispersi fuerant.

¹⁴Et reducam captivitatem Ægypti,

et collocabo eos in terra Phathures,

in terra nativitatis suæ,

et erunt ibi in regnum humile.

¹⁵Inter cetera regna erit humillima,

et non elevabitur ultra super nationes,

et imminuam eos ne imperent gentibus.

¹⁶Neque erunt ultra domui Israël in confidentia,

docentes iniquitatem ut fugiant, et sequantur eos:

et scient quia ego Dominus Deus.

¹⁷Et factum est in vigesimo et septimo anno, in primo, in una mensis: factum est verbum Domini ad me, dicens:

¹⁸Fili hominis, Nabuchodonosor rex Babylonis

servire fecit exercitum suum servitute magna adversum Tyrum:

omne caput decalvatum, et omnis humerus depilatus est:

et merces non est reddita ei, neque exercitui ejus, de Tyro,

pro servitute qua servivit mihi adversus eam.

¹⁹Propterea hæc dicit Dominus Deus:

Ecce ego dabo Nabuchodonosor regem Babylonis in terra Ægypti:

et accipiet multitudinem ejus,

et deprædabitur manubias ejus,

et diripiet spolia ejus:

et erit merces exercitui illius,

²⁰et operi quo servivit adversus eam:

dedi ei terram Ægypti pro eo quod laboraverit mihi,

ait Dominus Deus.

²¹In die illo pullulabit cornu domui Israël,

et tibi dabo apertum os in medio eorum,

et scient quia ego Dominus.

30¹Et factum est verbum Domini ad me, dicens: ²Fili hominis, propheta, et dic:

Hæc dicit Dominus Deus:

Ululate: Væ, væ diei!

³quia juxta est dies,

et appropinquat dies Domini, dies nubis:

tempus gentium erit.

⁴Et veniet gladius in Ægyptum,

et erit pavor in Æthiopia,

cum ceciderint vulnerati in Ægypto,

et ablata fuerit multitudo illius,

et destructa fundamenta ejus.

⁵Æthiopia, et Libya, et Lydi,

et omne reliquum vulgus,

et Chub, et filii terræ fœderis,

cum eis gladio cadent.

⁶Hæc dicit Dominus Deus:

Et corruent fulcientes Ægyptum,

et destruetur superbia imperii ejus:

a turre Syenes gladio cadent in ea,

ait Dominus Deus exercituum.

⁷Et dissipabuntur in medio terrarum desolatarum,

et urbes ejus in medio civitatum desertarum erunt:

⁸et scient quia ego Dominus,

cum dedero ignem in Ægypto,

et attriti fuerint omnes auxiliatores ejus.

⁹In die illa egredientur nuntii a facie mea in trieribus

ad conterendam Æthiopiæ confidentiam:

et erit pavor in eis in die Ægypti,

quia absque dubio veniet.

¹⁰Hæc dicit Dominus Deus:

Cessare faciam multitudinem Ægypti

in manu Nabuchodonosor regis Babylonis.

¹¹Ipse et populus ejus cum eo, fortissimi gentium,

adducentur ad disperdendam terram:

et evaginabunt gladios suos super Ægyptum,

et implebunt terram interfectis.

¹²Et faciam alveos fluminum aridos,

et tradam terram in manus pessimorum:

et dissipabo terram et plenitudinem ejus

manu alienorum:

ego Dominus locutus sum.

¹³Hæc dicit Dominus Deus:

Et disperdam simulacra,

et cessare faciam idola de Memphis:

et dux de terra Ægypti non erit amplius,

et dabo terrorem in terra Ægypti.

¹⁴Et disperdam terram Phathures,

et dabo ignem in Taphnis,

et faciam judicia in Alexandria.

¹⁵Et effundam indignationem meam super Pelusium, robur Ægypti,

et interficiam multitudinem Alexandriæ.

¹⁶Et dabo ignem in Ægypto:

quasi parturiens dolebit Pelusium,

et Alexandria erit dissipata,

et in Memphis angustiæ quotidianæ.

¹⁷Juvenes Heliopoleos et Bubasti gladio cadent,

et ipsæ captivæ ducentur.

¹⁸Et in Taphnis nigrescet dies,

cum contrivero ibi sceptra Ægypti,

et defecerit in ea superbia potentiæ ejus:

ipsam nubes operiet,

filiæ autem ejus in captivitatem ducentur.

¹⁹Et judicia faciam in Ægypto:

et scient quia ego Dominus.

²⁰Et factum est in undecimo anno, in primo mense, in septima mensis: factum est verbum Domini ad me, dicens:

²¹Fili hominis, brachium Pharaonis regis Ægypti confregi,

et ecce non est obvolutum ut restitueretur ei sanitas,

ut ligaretur pannis, et fasciaretur linteolis,

ut recepto robore posset tenere gladium.

²²Propterea hæc dicit Dominus Deus:

Ecce ego ad Pharaonem regem Ægypti,

et comminuam brachium ejus forte, sed confractum:

et dejiciam gladium de manu ejus,

²³et dispergam Ægyptum in gentibus,

et ventilabo eos in terris.

²⁴Et confortabo brachia regis Babylonis,

daboque gladium meum in manu ejus,

et confringam brachia Pharaonis,

et gement gemitibus interfecti coram facie ejus.

²⁵Et confortabo brachia regis Babylonis,

et brachia Pharaonis concident:

et scient quia ego Dominus,

cum dedero gladium meum in manu regis Babylonis,

et extenderit eum super terram Ægypti.

²⁶Et dispergam Ægyptum in nationes,

et ventilabo eos in terras:

et scient quia ego Dominus.

31¹Et factum est in anno undecimo, tertio mense, una mensis: factum est verbum Domini ad me, dicens: ²Fili hominis, dic Pharaoni regi Ægypti et populo ejus:

Cui similis factus es in magnitudine tua?

³ecce Assur quasi cedrus in Libano,

pulcher ramis, et frondibus nemorosus, excelsusque altitudine,

et inter condensas frondes elevatum est cacumen ejus.

Read in Logos

Public Domain