Amos 2:9–11

9 Ego autem exterminavi Amorrhæum a facie eorum,

cujus altitudo, cedrorum altitudo ejus,

et fortis ipse quasi quercus;

et contrivi fructum ejus desuper,

et radices ejus subter.

10 Ego sum qui ascendere vos feci de terra Ægypti,

et duxi vos in deserto quadraginta annis,

ut possideretis terram Amorrhæi.

11 Et suscitavi de filiis vestris in prophetas,

et de juvenibus vestris nazaræos.

Numquid non ita est, filii Israël? dicit Dominus.