Joel 2:21–24

21 Noli timere, terra:

exsulta, et lætare,

quoniam magnificavit Dominus ut faceret.

22 Nolite timere, animalia regionis,

quia germinaverunt speciosa deserti;

quia lignum attulit fructum suum,

ficus et vinea dederunt virtutem suam.

23 Et, filii Sion, exsultate,

et lætamini in Domino Deo vestro,

quia dedit vobis doctorem justitiæ,

et descendere faciet ad vos imbrem matutinum et serotinum,

sicut in principio.

24 Et implebuntur areæ frumento,

et redundabunt torcularia vino et oleo.