Job 35:4–8

4 Itaque ego respondebo sermonibus tuis,

et amicis tuis tecum.

5 Suspice cælum, et intuere:

et contemplare æthera quod altior te sit.

6 Si peccaveris, quid ei nocebis?

et si multiplicatæ fuerint iniquitates tuæ, quid facies contra eum?

7 Porro si juste egeris, quid donabis ei?

aut quid de manu tua accipiet?

8 Homini qui similis tui est, nocebit impietas tua:

et filium hominis adjuvabit justitia tua.