Isaiah 10:20–23

20 Et erit in die illa:

non adjiciet residuum Israël,

et hi qui fugerint de domo Jacob,

inniti super eo qui percutit eos;

sed innitetur super Dominum,

Sanctum Israël, in veritate.

21 Reliquiæ convertentur; reliquiæ, inquam, Jacob

ad Deum fortem.

22 Si enim fuerit populus tuus, Israël, quasi arena maris,

reliquiæ convertentur ex eo;

consummatio abbreviata

inundabit justitiam.

23 Consummationem enim et abbreviationem

Dominus Deus exercituum faciet in medio omnis terræ.