1 Maccabees 1:43–63
Clementine VulgateOther versions
Latin
English
- Apocrypha of the Old Testament
- AV 1873 The Cambridge Paragraph Bible of the Authorized English Version
- D-R Douay-Rheims Bible
- KJV Apoc The King James Version Apocrypha
- NRSVue New Revised Standard Version: Updated Edition
- RSV The Revised Standard Version
- RSVCE The Revised Standard Version, Catholic Edition
43Et scripsit rex Antiochus omni regno suo ut esset omnis populus unus: et relinqueret unusquisque legem suam. 44Et consenserunt omnes gentes secundum verbum regis Antiochi: 45et multi ex Israël consenserunt servituti ejus, et sacrificaverunt idolis, et coinquinaverunt sabbatum. 46Et misit rex libros per manus nuntiorum in Jerusalem, et in omnes civitates Juda, ut sequerentur leges gentium terræ, 47et prohiberent holocausta et sacrificia, et placationes fieri in templo Dei, 48et prohiberent celebrari sabbatum, et dies solemnes: 49et jussit coinquinari sancta, et sanctum populum Israël. 50Et jussit ædificari aras, et templa, et idola, et immolari carnes suillas, et pecora communia, 51et relinquere filios suos incircumcisos, et coinquinari animas eorum in omnibus immundis, et abominationibus, ita ut obliviscerentur legem, et immutarent omnes justificationes Dei: 52et quicumque non fecissent secundum verbum regis Antiochi, morerentur. 53Secundum omnia verba hæc scripsit omni regno suo: et præposuit principes populo, qui hæc fieri cogerent. 54Et jusserunt civitatibus Juda sacrificare. 55Et congregati sunt multi de populo ad eos qui dereliquerant legem Domini, et fecerunt mala super terram: 56et effugaverunt populum Israël in abditis, et in absconditis fugitivorum locis.
57Die quintadecima mensis Casleu, quinto et quadragesimo et centesimo anno, ædificavit rex Antiochus abominandum idolum desolationis super altare Dei, et per universas civitates Juda in circuitu ædificaverunt aras: 58et ante januas domorum et in plateis incendebant thura, et sacrificabant: 59et libros legis Dei combusserunt igni, scindentes eos: 60et apud quemcumque inveniebantur libri testamenti Domini, et quicumque observabat legem Domini, secundum edictum regis trucidabant eum. 61In virtute sua faciebant hæc populo Israël, qui inveniebatur in omni mense et mense in civitatibus. 62Et quinta et vigesima die mensis sacrificabant super aram, quæ erat contra altare. 63Et mulieres, quæ circumcidebant filios suos, trucidabantur secundum jussum regis Antiochi,
Public Domain